geschichte

D' Guggamusig Burgfätzer Malix isch am 26. Mai 2006 im Restaurant „Höchi“ in Malix gründet worda. Dia Meischta vo üs hend sich jo scho vorher kennt! Drum hemmer denkt, so a cooli Truppa voll Fasnachts-freudiga Lüüt muass doch eifach a Guggamusig gründa… ;o) Das hemmer denn eba au gmacht mit allem drum und dra!

d'Pipas vo Rhäzüns hend üs als Start as Kostüm gschenkt, wommer denn hend chöna mim Thema: „Ägypten“ in üsi 1. Saison starta. Do nomol as grosses Dankeschön an d'Pipas! Churz druf aba hemmer au scho üses erschta Geld für d’Vereinskassa chöna verdiana. Während dr Fuassball-WM hend dr Didi und d’Margrith vom Restaurant Alparösli in Chur as Zelt ufbaut, dr WM-Dome…. Döt hemmer chöna mitama Grossufgebot an Mitglieder go serviera, Biar zapfa und brötla, as mega Erlebnis gsi! Zu dem allem nomol as riesa Dankeschön für dä geniali Monat!!!

Am Churerfest hät üsi Truppa natürlich au nid gfählt, miar händ mitama Spontanisatz am Fischerverein Chur dörfa unter d’Arma griifa. Jo und halt genau so chunt Geld in üsi Kassa wo miar natürlich dringend brucht hend für Instrument und Kostüm! Do miar scho d’Fasnacht herbisehnend, sind miar wacker am proba und as tönt im Fall scho huara guat und do chasch nu säga: alles geili Siacha, schololololo…. ;o)!!

Am 11.11. isch de natürlich Post abganga. Um dia 6i sind miar denn im Alparösli in Chur am Didi zum Geburi go gratuliara, echt schön gsi und dr Didi isch vo üsem ersta Uftritt zu träna grüahrt gsi. Nochama Stuck Chuacha und ama gsponsorta Getränk sind miar de ab uf Malix, schliesslich het öt jo au üsi Burg no gwartet. Mit ema gröbera Guggakonzert händ miar denn d'Awohner vo Malix zum stuna brocht. D’Burgfee und ihra Maa händ allna Glüahwii offeriart und denn isches durchs Dorf ganga, natürlich mitama Halt bim Tankstellashop AGROLA, au döt Merci für da Drink! Und zum absoluta Höhepunkt ischs im Restaurant Höchi kho, döt isch denn das Ganza zumna unvergesslicha Obig worda.

As Probewuchaend dörf natürlich au nid fehla. Dia ganzi Truppa hät sich am Samstig 25. November um dia 13.00 in Malix bir Mehrzweckhalla troffa. Denn isch blosa und gschlaga worda und ds ganza Wuchaend zur Freud oder Leid halt vo de Awohner, aber ohne Fleiss kein Preis. Allna recht herzlicha Dank wo a dem Wuchaend dia Gugga unterstützt hend, denn ohne Heinzelmännli goht das ganza nid. Am Sunntig am drei händ miar alles verruumt und sind echt zfrida und zum Teil echt übermüadet uf da Haiwäg ganga.

In Obersaxa hemmer an super aber au an iiskalta Umzug gha. Brrrrrr... Nochher hemmer üs in dr Turnhalla mit feinem Glüahwii und Kaffi Lutz chöna ufwärma. Am Obig hets denn no an Guggaball gäh wos echt abganga isch. Jo, bi da ainta isch d'Schminki vor Hitz scho fascht drvo gloffa... ;o) Denn simmer z'mitzt in dr Nacht mit üsna 2 Büssli wieder heikehrt...

Am Weekend Mümliswil hemmer an super Uftritt am Guggaball anagleit gha. Dia ainta früahner, dia andera spöter sind denn zrug in d'Unterkunft go schlofa... ;o) Ziemlich übermüadat hemmer denn no dr Umzug gha mit aschlüssendem Monsterkonzert.

Au ds Zizers hemmer alles gäh am Umzug.

Natürlich isch au üsi eignig Fasnacht denn cho. In dr Höchi in Malix hemmer am Nomittag an klina Kindermaskaball gha, wo alli kliina uuh freud gha hend. Am Obig isch denn d'Party wiiter ganga mit da Grossa usam Dorf und Umgebig.

A super 1. Saison isch denn ds End ganga...

 

by chris